جەبار جەمال غەریب

من سەر بە هیچ نەوەیەك نیم، هیچ ئەخلاق و ئەدگارێك نییە لەكۆندا هەڵمگرتبێ و ئەمڕۆ هەوڵ بدەم بیپارێزم. هیچ جوانی و شانازییەكیش نابینم تێكەڵی بم و پێی دڵخۆش بم و بڵاوی بكەمەوە. نا من سەر بە هیچ نەوەیەك نیم. ناتوانم لەسەر جنێوێك، لەسەر ئیهانەیەك، لەسەر ئەوەی شۆڕش میز دەكاتە ژێر داری ئازادی، لەسەر ئەوەی یەكێك سەرم دەشكێنێ دەست لە كەس بەرز بكەمەوە.
نەوەكان هەر هەموویان لەپاشای میدیەكانەوە، لەكاوەی ئاسنگەرەوە، لەمیری بادینان و سۆرانەوە، لەسلێمان پاشای بابانەوە، لەشێخ سەعید و شێخ ئەحمەد و قازی و شێخ مەحمودەوە هەر هەموویان بە كوتك و خەنجەری تیژ و دڵی وەك بەردیانەوە بەسەرمدا تێدەپەڕن، ئێسقانەكانم، دەمار و موولولەكانم، دڵ و كەللەسەرم پان دەكەنەوە، سوپای نەوەكان بەبێویژدانی و دڵڕەقی ئەوڕۆوە، بەپێیەكی ئەوەندەی باشووری كوردستان پان، ئەوەندەی كەركوك گەرم و ئەوەندەی سنە بریندار ورد وردم دەكات.
ئەمڕۆ كورد حكومەت و دەوڵەتە، ئیمزای كورد دەیخوات و خەڵكی پێ دادەمەزرێ و خەڵكی پێ نانبڕاو دەكرێ و خەڵكی پێ دەكوژرێ و خەڵكیشی پێ سووك دەكرێ. ئەمڕۆ كورد دەسەڵاتی هەیە، تورك هاوكاری دەكات و باڵەخانەی بۆ دروست دەكات، فارس ئاسایش دەپارێزێ و عەرەب دەیكاتە سەرۆك كۆمار و وەزیری دەرەوە و سوپاسالار. ئەمڕۆ كورد دەسەڵاتی هەیە. پیاوێك دەڕفێندرێت و دوای چوار رۆژ پیاوكوژە بە ویژدانەكان مەیتەكەی وەك دیاری سەری ساڵ بۆ ژن و چوار منداڵەكەی فڕێدەدەنەوە بەر دەرگا، لەبەرئەوەی پۆلیس سەرقاڵە، من ئەوە لەزاری پیرێژنێكەوە دەبیستم. كوڕێكی گەنج و ژنێكی بەتەمەن دەكوژرێن و تەرمەكەیان لەكێوی قاف فڕێدەدرێ و برایانی دژی توندوتیژی دوای بیست ساڵ و پێنج رۆژ بۆ كشەلێكردنی رۆژنامەكان دەڵێن بەنیازین لێكۆڵینەوەیان لەسەر بكەین.
ئەمڕۆ كورد دەسەڵاتی هەیە، نەوەیەك لەوپەڕی توڕەیی و یاخیبووندا، لەسەر ئەوەی بیست ساڵی تەواوە گوێی لێناگیرێ، شەقامەكان كۆنتڕۆڵ دەكات، مەرقەدەكان دەداتە بەر شەق و خانۆچكە رزیوەكانی شەرەف وێران دەكات.
من سەر بە هیچ نەوەیەك نیم. ئەو نەوانە بۆیە هەن، بۆ ئەوەی دوژمنی یەكتر بن، بۆ ئەوەی دوژمنی خۆیان بن، بۆ ئەوەی بەسەریەكدا هاواركەن و یەكتر سووك سووك كەن. ئەو نەتەوە پێنج كەسیەی كە ناوی كوردە، ئەو عەشیرەتە كێویەی هەمیشە حەزی لەوێرانكردنە، ئەو پێنج كەسەی دوژمنی زانست و سیستەم و ئاوەدانیە، پەرلەمان دروست دەكات بۆ ئیهانەكردنی خەڵك و یەكتر سووككردن. حكومەت دروست دەكات بۆ پشودانی پیاوانی گەورەی عەشیرەت و چاخواردنەوە، پۆلیس دروست دەكات بۆ بندیوار و كەڵەگایی. ئاسایش دروست دەكات بۆ ترس و تۆقاندن. ئاپارتمانی گەورە دروست دەكات بۆ تفكردنە چاوی خەڵكی هەژار و كاركەر و قوڕ بەسەر. ئۆپۆزسیۆن دروست دەكات بۆ گاڵتەكردن بە هەموو شتێك، رۆشنبیر و سیاسی دروست دەكات بۆ پەرستن و عبودیەت.
سڵاو لەهەموو ئەوانەی كوژران، جارێكی دیكە بەشداری هەڵبژاردنی درۆ ناكەن، جارێكی دیكە خەم لەكەركوك ناخۆن و لەریزی بێ حورمەتیكردن لەهیچ فەرمانگەیەك چاوەڕێ نابن. جارێكی دیكە گوێ لەوتاری بێمانا و هیچی پیاوە سیاسییەكان ناگرن. جارێكی دیكە بیر لەوە ناكەنەوە كامیان درۆیەكانیان گەورەترە، دەسەڵات یا ئۆپۆزسیۆن؟ برسی یا تێر؟ عاشق یا جەللاد؟
من سەر بە هیچ نەوەیەك نیم، هەموو نەوەكان پێیان ئاساییە كچێك لەسەر مەسیجێك بكوژرێ، كە جگە لەغەریبی خۆی هیچی دیكەی تێدا نەنووسیوە. جگە لەبۆنی تەنهایی بۆنی هیچی دیكەی لێ نایە. ئەو وڵاتە وڵاتی دێوەكان، دێوی پیر و گەنج. هەموو دێوەكان حەزیان لەپانكردنەوەی سەری یەكترە، هەموو دێوەكان گاڵتە بە قوربانی دەكەن.
چەند دەمەوێ ناویم بەدەمدا بێت، رستەیەكی بۆ بنوسم، ناكرێ، چونكە دەنگێك لەناو كتێبەكانەوە، لەناو ماڵ و باخچەكانەوە، لەناو گوڵ و گەڵاكانەوە پێمدەڵێ "ئەو لەبەر ئەوە نەكوژرا، چونكە رۆژنامەنوس بوو، چونكە قوتابی و رەخنەگر بوو، چونكە خەونی سەیری دەدیت، ئەو بۆیە كوژرا، چونكە لەو وڵاتەدا مرۆڤ بێنرخە، خوێن بێبەهایە، ئاسانە سەربڕین، ئاسانە فەرامۆشكردن و سڕینەوە.
ئەو هاوڕێ كوژراوەم خۆشبەختە، سەری بەو هەموو جنێوبارانە كاس نەبوو، دیمەنی یەكتر تاوانباركردن و بێحورمەتیكردنی یەكتری نەدی. لەوەش باشتر بۆگەنی ئەو مێژووە پڕ خوێنەی حیزبەكان بە لووتیدا ناچێ، كە بە نیازن پەڕەپەڕە هەڵیدەنەوە.