محەمەد گۆران

ئەفسەرێكی بەریتانی خانەنشینكراو لەدوای جەنگی دووەمی جیهانی، بە یەكێ لەشەقامەكانی لەندەن گوزەر دەكات و دەبینێت، وا چەند كەسێك تەرمێكیان بەسەر شانەوەیە و هۆڕ هۆڕیش دەگریێن! ئەویش دەپرسێت، ئاخۆ مردنی یەكێك ئەو شین و واوەیلایەی دەوێت؟ ئەی بە من دەڵێن چی، كە لەبەرلین گەڕامەوە لەندەن، تەرمی دوو ملیۆن كەسم لەسەر شەقامەكان بینی، خۆ من دەست بە گریان بكەم تا رۆژی قیامەت هێور نابمەوە!.
لەسەر كوشتنی سەردەشت عوسمان زۆر نوسرا، زۆری دیكەش ماوە! ئەو كوڕە قوتابی من بوو لەناوەندی زیوەری كوڕان، ماڵەكەیان چەند هەنگاوێك دوور و هاوسێی ئێمەبوو، من لەمنداڵییەوە دەمناسی، دەبووا من لەهەمووان كوچكم گەرمتر بووا، لەوانی دیكە زیاترم نوسیبا (تا رۆژی قیامەت) بەڵام ئەزعەفول ئیمان، جگە لەئامادەكردنی یەك راپۆرت لەرۆژی هێنانەوەی تەرمەكەی، چیدیكەم نەگوت! چیم بگوتبا؟ بڵێم لەو هەولێرە گەر كچ و كوڕێكی عاشق لەژێر دارێك دابنیشن، پۆلیسێكیان لێ پەیدا دەبێت و دەڵێ ئێوە چی یەكترین؟ ئەی خێرە كوڕە گەنجێكی ناسك و نازدار بەو بەیانییە روونە و بەو هەموو شێروباز-گەیە تێپەڕ بكرێت و بكوژرێت، دواتر وتەبێژێك نەبێت بەقسەیەكی مەعقووڵ هەر هیچ نەبێت پاساو بۆ دایكە جەرگسوتاوەكەی بهێنێتەوە؟ ئاوام بگوتبا؟! تازە چ سودێكی هەیە؟ ئەو كاتە دەشیانگوت، ئۆهۆ ئەوە پارتیمان تۆمەتبار دەكات.
ئەی باشبوو بمگوتبا، ئاخر رۆشنبیری سلێمانی كەی هەولێری بەموسەقەف دەزانن، تا ئەو سینگ كوتان و قژ رنینەوەی بۆ بكەن؟! ئەو كاتەش دەیانگوت، ئەوەش زوڕناژەنێكی دیكەی پارتی! لێگەڕێن، زوو یا درەنگ بكوژانی سەردەشت بەدەردی دیكتاتۆر سەدام حوسێن دەچن (زۆریش دڵنیام لەو قسەیەم).
بەڵام خۆ هەندێ مەسەلەی دیكە هەیە، لەو بڕوایەم گەر پیاو! قسەی لەسەر نەكات تەڵاقی بكەوێت!.
لەژمارە (38)ی گۆڤاری (سڤیل)، راپۆرتێك بڵاوكراوەتەوە بەناونیشانی (لەپەرلەمان فڕكان فڕكانی پارەیە) سەبارەت بەو 9 پەرلەمانتارەی كە دووبارە پارەیان بۆ كڕینی سەیارە وەرگرتۆتەوە، ئاوا نوسراوە "سۆزان خالە شیهاب رەوایەتی دەدات بەكڕینی ئۆتۆمبێل بۆ ئەو (9) پەرلەمانتارەی خولی پێشوو، كە ئەم خولەش پەرلەمانتارن، دەڵێت ئێمە ئەگەر لەپەرلەمان نەبوینایە نەماندەتوانی ئەو بڕە پارەیە وەربگرین، بەڵام ئێستا ئێمە لەپەرلەمانین و هاتوچۆ دەكەین و سەردانی شوێنان دەكەین، هەموو ئۆتۆمبێلێكیش ئەو هەموو كارەی پێبكەیت، ماندوو دەبێت، بۆیە زۆر زۆر ئاساییە كە ئەو پارەیەمان پێبدرێت".
منیش دەڵێم، سۆزانی خالە شیهاب! كە یەكێك لەداكۆكیكارە سەرسەختەكانی هەمواركردنی یاسای باری كەسێتی ژمارە 188ی ساڵی 1959 بوو، كە دواتر مادەی 6ی یاسای ژمارە 15ی 2008 جێگەی یاسا كۆنەكەی گرتەوە و فرەژنی تێدا سنورداركرد، كارێكی شیاو بەپیاوان نەبوو، چونكە پیاویش كە ژن دەهێنێ، دوای چوار ساڵ ئەو ژنە چەند زگێك دەكات و ماندووی دەبێت! ژن لەئۆتۆمبێل زووتریش ماندووی دەبێت، مەگەر پیاویش حەز ناكا ژنێكی نوێتری هەبێت؟!
بەداوای لێبوردنەوە لەژنانی بەڕوومەتی كوردستان، بەڵام ئەو ئۆتۆمبێلانەی پەرلەمانتاران زۆر بەنرخترن لەگیانی ژنان، نابێت پەرلەمانتارەكان ماندوویان بكەن!
مەگەر ئەوان ئێمەیان فێرنەكرد كە ئەو ئەزموونەی كوردستان، بەری رەنجی لەبن نەهاتووی خوێنی 182 هەزار ئەنفال و 5 هەزار رووحپاكی هەڵەبجەیە! كەوابوو ئەو ئۆتۆمبێلانەی ژێر پەرلەمانتاران تەژییە لەپروشكە خوێنی دەیان هەزار ژنی ئەنفالكراو و هەڵەبجەییەكان، نابێت ماندوو بكرێن! دەبێت تایەكانیان بەزمان بلێسرێنەوە..بیلێسنەوە..بیلێسنەوە. ئەگەر راستە ئەو ئەزموونە بەری رەنج و خوێنی ئەوانە!؟
زۆر حەیف بۆ پەرلەمانتارە ئیسلامییەكان، مەلایەكان، ئەوانیش دەبووا ئەو پارەیان وەرنەگرتبا، چونكە پێشتر شتێكی دیكەیان فێر كردبووین. دەستخۆش بۆ ئەو 21 پەرلەمانتارەكەی گۆڕان.
بژی كورد - بژی كوردستان.