رێبوار رەزا چوچانی

یەكێك لەو مەترسیانەی كە رووبەڕووی مرۆڤ دەبێتەوە، ململانێیە لەگەڵ عەقڵە سەلەفییەكان، چونكە ئەو عەقڵانە جگە لە زمانی توندوتیژی و هێز و باز و جنیۆ و تۆمەت و فەتوا و كوشتن و كۆمەڵێك شتی تر، ناتوانن بەشێوەیەكی عەقڵانی مامەڵە بكەن، ئەو عەقڵە سەلەفییانە بەرهەمی توندوتیژی و كۆنخوازی و رەتكردنەوەی زمانی گفتوگۆن، ناتوانن حورمەت لە كەرامەتی ئەوانی تر بگرن، چونكە ئەوان لە كەشێكدا گەشەیان كردووە، لێوڕێژ بووە لە رەتكردنەوەی بەرانبەر و لە ناوبردن و دروستكردنی وێنای ناشیرین بۆ ئەوانەی لەگەڵیان نین، كە دواجار هەوڵدان بۆ دروستكردنی وێنای ناشیرین بۆ بەرانبەر، سەرەتای هەنگاوی سڕینەوە و لەناوبردنییەتی، بۆیە دەبێت ئەو زمانە توندوتیژەی عەلی باپیر كە بەرانبەرەكەی بە "خیانەتكار" وەسف دەكات و ئەو سوكایەتییانەی وتەبێژی كۆمەڵەكەشی بە هەڕەشەی بزانین. كە زیاتر لە شەست نوسەر و رۆژنامەنووس بەوە تۆمەتبار دەكات، دەستێك هەیە و هانمان دەدات، بۆ ئەوەی سوكایەتی ئەمیرەكەی بە سرودی ئەی رەقیب گەورە بكەین.
عەلی باپیر كاتێك سوكایەتی بە هێمایەكی بەرزی نەتەوەكەی خۆی دەكات و حورمەت بۆ خوێنی شەهیدان و قوربانییانی نەتەوەكەی خۆی دانانێت، كاتێك بێباكانە بە ناوی شەرعەوە رەوایەتی بە سوكایەتییەكانی خۆی بە هەستی نەتەوەكەی دەدات و بەرگری لەو سوكایەتییانەش دەكات، دەبێت چاوەڕێی كاردانەوەی ئەو كەسانەش بێت، كە پێیانوایە نەتەوە لەسەرووی هەموو ئایدیۆلۆژیایەكەوە، عەلی باپیر بێشەرمانە سوكایەتی بە سروودێك دەكات، كە تا ئێستاش هێمای زیندوو مانەوەی میللەتەكەی خۆیەتی، چونكە تا ئێستاش كورد لە رۆژهەڵات دەچەوسێنرێتەوە و رۆژانە هەواڵی لە سێدارەدانی كورد دەبیستین كە لەلایەن هاوبیرەكانی عەلی باپیرەوە لە ئێران لە سێدارە دەرێن، رۆژانە شەهیدكرنی كورد دەبیستین لە باكور، رۆژانە هەواڵی چەوساندنەوەی كوردی رۆژئاوای وڵات دەبیستین، خێرە عەلی باپیر و كۆمەڵەكەی، كوردایەتی و كوردبوون و ئازادی و سەربەستی دەبەستنەوە بەو نیمچە ئازادییەی كە لە سێ پارێزگای هەرێمی كوردستاندا هەیە؟!
عەلی باپیر كەوتۆتە هەڵەیەكی زەقەوە و هەست دەكات ناتوانێت خۆی لەو هەڵەیە دەرباز بكات، بۆیە دێت بە هێرش و زمانی توندوتیژ و دروستكردنی وێنای ناشیرن بۆ ئەوانەی نەیاری ئەو هەڵوێستە پڕ سوكایەتییەی ئەون، دەست دەكات بە پەلەقاژەی راستكردنەوەی هەڵەكەی و هەوڵی جوانكردنی خۆی دەدات، عەلی باپیر و كۆمەڵەكەی رۆژێك لە رۆژان دانی خێریان بە شێركۆ بێكەسدا نەناوە، خێرە ئێستا باس لە تێكستێكی "سەردەمی"یانەی شێركۆ بێكەس دەكەن؟!
عەلی باپیر ئێمە بە "خیانەتكار" ناو دەبات، كە لە دژی ئەو هەڵوێستە شەرمهێنەرەی ئەو واژۆمان كۆكردۆتەوە، بێئاگا لەوەی زۆربەی ئەو نوسەر و رۆژنامەنووسانەی واژۆییان لەسەر ئەو بەیاننامەیە كردووە، سەر بە نەوەیەكن ئەگەر نەیانتوانیبێت شتێكی باشتر لە نەوەكانی پێش خۆیان پێشكەش بە نەتەوەكەیان بكەن، بەڵام خیانەتیشیان لێنەكردووە، وتەبێژی كۆمەڵەكەی عەلی باپیر، ئێمە بەوە تۆمەتبار دەكەن كە "دەستێك هەیە لە پشتیانەوە و دەیانجوڵێنێت"، بێئاگا لەوەی خۆمان لەوە بە گەورەتر دەزانین، كە ببینە جێبەجێكەری مەرامی خەڵكانی تر و "سیخوڕی بەسەر خەڵكی ترەوە" بكەین!!.
من لە عەلی باپیر دەپرسم ئایا خیانەت ئەوەیە كە ئامۆژگاری سەركردەكان بكەین سوكایەتی بە نەتەوە و قوربانییانی نەتەوەكەی خۆیان نەكەن، یان خیانەت ئەوەیە "مەلەفی سیخوری بەعست هەبێت"، ئایا خیانەت ئەوەیە كە مرۆڤ هەوڵبدات وەفادار بێت بەرانبەر بە خاك و نەتەوە، یان ئەوەیە "خیانەت لە هاورێكانی خۆی" بكات و ئەوانیش داوا بكەن، كە لە "دادگایەكی شەرعییدا دادگایی بكرێت"، ئایا خیانەت ئەوەیە رێز لەو قوربانییانە بگرین، كە لەسەر كوردبوون هەرچی عەزابی ئەم دونیایە هەیە چەشتوویانە، یان سەنگەر گرتن لە نەتەوە و مێژوو و قوربانیانی گەلەكەی خۆت؟
بۆیە خەڵكی هوشیار ئەوە دەزانێت، كە ئەو هەڵوێستەی ئەو نوسەر و رۆژنامەنووسانە، ئەگەر خیانەت بێت لە بەرانبەر نەتەوە و گەل و قوربانیانی، ئەوە بە دڵنیاییەوە عەلی باپیر كوردایەتی كردووە، بەڵام ئەگەر ئەو هەڵوێستە خیانەت نەبێت و سوكایەتیكردن بە هێما نەتەوەییەكان یەكێك بێت لە خیانەتەكان، كەواتە عەلی باپیر كوردایەتی نەكردووە و بۆیشی نیە پۆزی كوردایەتیمان بەسەردا لێبدات.