وشیار ئەحمەد ئەسوەد

لەوە دەگەڕێم هەڵسەنگاندنم بۆ زۆربەی كارە هونەرییەكانی هەڵكەوت زاهیر چییە، ئەوەیان دیوێكە و زۆرم لە بارەیەوە گوتووە، بەڵام لەو سووكایەتییەی عەلی باپیر بە سروودی نەتەوەیی "ئەی ڕەقیب"ـی دەكات، ناكرێ باز بەسەر هەڵوێستەكەی هەڵكەوتدا بدەین و بە تەنیا یەخەگیری ئیسلامی سیاسی بین.
من دەڵێم ئەگەر هەڵكەوت زاهیر و شێركۆ بێكەس بە میلۆدی و تێكست دەستیان بۆ گۆڕینی "ئەی ڕەقیب" نەبردایە، هەرگیز پێموانییە عەلی باپیر ئەو بوێرییەی لا دروست بووایە دەستی بۆ بەرێت. ئەوەی سەیرترە و دەمانخاتە گومانەوە، ئەوەیە ئێمە ماوەیەكی كەم نییە عەلی باپیر وەك سەركردەیەك لە بزووتنەوەی ئیسلامی سیاسی لەكوردستاندا دەناسین، چ كاتێكیش ئەم تەرزە هەڵوێستانەمان لەلا شك نەبردووە، خێرە لەم ماوەیەی دواییدا هەڕەشە لە"ئەی ڕەقیب" دەكات و لەگەڵیدا داكۆكیكارانی ئەو سروودە نەتەوەییە بە خیانەتكار ناو دەبات؟ لەوەش سەیرتر نەتەوەییبوونی عەلی باپیرە، كە لەلایەن راگەیاندنی حزبەكەیەوە دەكرێتە موزایەدە بەسەر ئەو نیشتمانپەروەرانەی داكۆكی لە "ئەی ڕەقیب" دەكەن.
پێشتر گوتوومە و ئێستایش جەخت دەكەمەوە، تێكەڵبوونی هەردوو چەمكی نەتەوەیی و نیشتمانی كێشەی لەلای ڕەقیبانی "ئەی ڕەقیب" دروست كردووە، دەكرێ ئێمە سروودی نەتەوەیی و نیشتمانیشمان هەبێت، بەڵام لە نەتەوەییبووندا ئەستەمە جێگرەوە بۆ "ئەی ڕەقیب" بدۆزرێتەوە، چونكە ئەمیان پێوەستە بەكوردستانی گەورەوە، مەبەستم جیاكردنەوەی باشوور لە پارچەكانی تری كوردستان نییە، چونكە ڕاستیتان دەوێ ئێمە لە باشووریشدا ئەو قۆناغەمان تێنەپەڕاندووە "ئەی ڕەقیب" بە بەسەرچوو وەربگرین، خۆ كەركووكیش بەشێوەی ماردین و قامیشلۆ و مهاباد پێویستیی بە "ئەی ڕەقیب"ـە. ئەگەر باس لە ژیانی نەتەوە جیاجیاكانی كوردستانیش دەكەن، تا ئێستا چ ئاوازێكی دژایەتیكردنمان بۆ "ئەی ڕەقیب" لەلایەن هیچ یەكێك لەو نەتەوانەوە گوێ لێ نەبووە، ئەوانەی كەوتوونەتە دژایەتیكردنەوە، چ بە ناوی ئیسلامییەت و چ بە ناوی مۆدێرنەوە، كوردن كورد!.
عەلی باپیر بەپێی گوتەكانی، خۆی لە هەموومان بە نەتەوەییتر دەخوێنێتەوە، كەچی دنیایەك كێشەی كوردی جێهێشتووە و بە "ئەی ڕەقیب"ـدا هەڵگژاوە، یان دروستتر بڵێم ئەوەندەی دژایەتیی ئەو سروودە نەتەوەییە دەكات، لەو بڕوایەدا نیم ئەوەندە بەڕژدی یەخەگیری دژایەتیكارانی مادەی 140 بووبێت، بۆیە بەدیدی من هەڵنەستانی بۆ "ئەی ڕەقیب" بە ناوی ئیسلامەوە، هەڵنەستانە بۆ مێژووی خوێناوی و چەوسانەوەی میللەتێك، كە خۆی یەك لە تاكەكانیەتی. سەیرە! ئەم برالەیە دەیەوێ لەم ساتە هەستیارانەدا چیمان لە بیر بباتەوە وا بەم ڕژدییە قۆڵی لە "ئەی ڕەقیب" هەڵماڵیوە؟.
جەخت دەكەمەوە، ئەوەی پێشتر ئێمە لە دامەزراندنی "دەستەی داكۆكیكردن لە سروودی "ئەی ڕەقیب"ـدا كردمان و تا ئاستێكی زۆریش ڕۆڵمان لە پووچەڵكردنەوەی ئەو بیرۆكەیە هەبوو، كە هەڵكەوت زاهیر و شێركۆ بێكەس كاریان بۆ دەكرد، بۆ ئێستا لەوە پترمان پێویستە، نەك تەنیا ئیمزا كۆكردنەوە، بگرە بووژانەوەی ئەو دەستەیە لەم كاتەدا بەپێویستتر دەبینم، كە هەر كاتێك بخوازێ لە ڕێگەیەوە خۆپێشاندانی جەماوەریش بۆ داكۆكیكردن لە "ئەی ڕەقیب" بكرێت.
بەداخەوە من لەو ئیمزا كۆكردنەوەیەی ئەو برا ڕۆژنامەنووس و نووسەرانە بێئاگابووم، ئەگەر نا، ئەوە نەك تەنیا ئیمزا، بگرە بە 10 پەنجە دژایەتیكردنی ڕەقیبانی "ئەی ڕەقیب"ـم مۆر دەكرد، ئێستایش ئیمزای خۆم دەخەمە پاڵ ئیمزای ئەو برا نیشتمانپەروەرانەم و لە حزووری "ئەی ڕەقیب"ـدا هەمیشە دەست لەسەر سینەم.