رێبوار سیوەیلی

ئەم پرسیارەتان پەیوەندییەكی راستەوخۆی بە گۆشەی وەڵامەكانی منەوە نییە لەسەر ئۆپۆزیسیۆن و دەسەڵات، لەوەش مەترسیدارتر ئەوەیە پەیوەندیی بە تایەفەیەكی كۆمەڵگای ئێمەوە هەیە، كە لە هەر كەسانێكی تر زیاتر شەڕی تایەفەگەری و حیزبایەتی و شەخسییان كردووە، كە پێیاندەگوترێ: "نووسەران". من لەمێژە كاتێ ئەم ناوەم گوێ لێدەبێت، یەكسەر كۆمەڵێ بوتڵە عارەق و تۆران و شەڕ و پشی پشیی كەسانێكم بۆ حیزب و كەسایەتیە سیاسییەكان بیر دەكەوێتەوە، كە زۆر كەم هاوبەشیی لەژیانی هاوسەر و منداڵەكانیاندا دەكەن و بەردەوام لەنادی و چایخانە و كۆنفرانس و فیستیڤاڵ و لیستی ئەرزە وەرگرتن و ئیمتیاز سواڵكردندا وەستاون و قسە و قسەڵۆك و ناو و ناتۆرە بۆ ئەم و ئەو دروستكردن و من وامكرد و وامگوت و وام نووسی، پیشەیانە. ئەم وێنەیەی نووسەران پێویستە چاك بكرێ و جوانبكرێ و كاری نووسەری بگێڕدرێتەوە سەر مەداری ڕاستەقینەی خۆی، كە بریتیە لەبیناكردنەوەی ڕۆحیی و مەعنەوی و ئیستاتیكیانە و ویژدانیانە و ئەخلاقیانەی مرۆڤ و كۆمەڵگای كوردی. ئەگەر پارتی و یەكێتی لەم ڕوانگەیەوە هەر یەك لەو لیستانەیان فەرزكردوون، ئەوە كارێكی باشە و هیچ گرنگ نییە كێ و لە كام تەمەن و بە چ باكگراوند و پێشینەیەكی ئەدەبییەوە و بەرهەمی چۆنە و چەندە، بۆتە سەرۆك و جێگری سەرۆكی یەكێتی نووسەران. چونكە ئەو پێگەیە، شوێنێكی ئیدارییە و كاری ئەوانیش بریتیە لە زەمینەسازكردن بۆ ئەوەی نووسەران، بە گەنج و بەتەمەن و فرەیی بەرهەم و بەبێ گوێدانە ئەوەی خزمی كێ و خەڵكی كوێن، بتوانن بەهۆی نووسین و داهێنانەوە، بەهۆی بەشدارییان لە پەروەردەی ڕۆحیی منداڵان و نەتەوەكەیانەوە، ئەركی ڕاستەقینەی خۆیان جێبەجێ بكەن. ئەركی نووسەران لەم قۆناغەدا قورس و زۆرە، ئەگەر یەكێتی نووسەرانیش بتوانن بەشێوەیەكی بەرپرسیارانە پلانی كاركردنی خۆیان دابڕێژن و نەبنە دائیرەیەك بۆ ئیمتیاز وەرگرتن، بەڵكو ئەركیش بۆ نووسەران دەستنیشان بكرێ و هەر نووسەرە بەپێی ئەو ئەركەی دەیگرێتە ئەستۆی خۆی، ئیمتیاز وەربگرێت، ئەوە كارێكی باشە. پێویستە ئەم یەكێتی نووسەرانە، لە هەموو قۆناغەكانی تری تەمەنی یەكێتی نووسەران كراوەتر، ناشارچێتیتر، بەرپرسیارانەتر، لێبووردوانەتر و هەروەها لە خۆبووردوانەتر كار بۆ ئامانجەكانی خۆی بكات و هەرگیز سەرۆك و جێگیرەكەی، كە یەكێتی و پارتیان لە پشتە، میزاجیانە و ئاراستەكراوانە و بچكۆلانە، لەگەڵ كەیسی نووسەران و ڕۆشنبیرانی جیدیدا ڕووبەڕوو نەبنەوە و بەو پەڕی متمانەوە، داكۆكیی لە مافی نووسەران بكەن و یەكهەڵوێست و بوێر بن. من زۆرم پێخۆش بوو، گەر یەكێتی نووسەران، وێڕای پێگەی سەرۆك و جێگرەكەی، ئەنجومەنێكی بڕیاردانیشیان هەبوایە و بە كۆدەنگی نووسەرانی گشت شار و شارۆچكەكان، كاریان بكردایە و بڕیار و داخوازییەكانیان بەرئەنجامی گفتوگۆ و كۆدەنگی گشت نووسەرانی كوردستان بوایە. پێویستە ئەم دەورەیەی یەكێتی نووسەران، ڕازیكەری گشت نووسەران بێت، كە ئەوە زەحمەتە. پێویستە ئاگای لە نووسەرە گەنجەكان بێت و زۆریان لێدامەزرێنێت، چونكە ئەوان ماندوویی ناناسن و سنگفراوانتریشن، پێویستە ئەم یەكێتی نووسەرانە هەر تەنیا یەكێتی نووسەرانی سلێمانی و هەولێر نەبێت و بیسەلمێنێ كە یەكێتی نووسەرانی گەرمیان و كەركووك و بادینان و ڕانیە و قەڵادزە و چۆمان و سۆران و بەردەڕەش و خانەقین و كەلار و هەڵەبجە و شارباژێڕ و یەكێتی نووسەرانی كوردانی ئەوروپا و میوانانی خۆرهەڵات و باكوور و خۆرئاوای كوردستانە. ئەگەرچی ئەم خولەی یەكێتی نووسەرانیش ئیمتیازێكی زۆر زیاتری دایەوە بە نووسەرانی نێرینە و ئاوەكەش لە سەرچاوەكەوە لێڵە. بەڵام هیوادارم ئەندامانی داندراو، بوێریی ئەوەیان هەبێت كە گرنگیی بە خانمە نووسەرەكانیش بدات و لەسایەی ئەم خولەدا ئەدەبی مێیینەیی ئێمە خۆی بۆ داهێنانی مەزن تاقیبكاتەوە. یەكێتی و پارتی بە فەرزكردنی لیست كارێكی خراپیان كرد، بەڵام لەوە خراپتر ئەوەیە كە ئەو نووسەرانە یەكێتیانە و پارتیانە ڕەفتار بكەن و خزمخزمێنەی حیزبی بگوێزنەوە بۆ یەكێتی نووسەران. ئەگەر وا بكەن، بەو قورحانە وا لە سینە ئیمانارا، بەعزێ وەك ئێمەومانان وەك سەگ بەرەڵا ئەو دەشت و دەرەمان لێ تێت، ئەوێ هەر لە دوورەوە قرووسكەمان وێ و كەسیش گوون خۆی بە هاوارمان ناسڕێتۆ..