جەبار جەمال غەریب

كوردایەتی چیە؟ وشەیەكی بێ رەنگ و بۆنە؟ ناگیرێ و نابینرێ؟ كوردایەتی تەنها ئەو هەست و شعورەیە كورد بەرانبەر دوژمنەكانی دەریدەبڕێ؟ مرۆڤی كورد تەنها بەرانبەر دوژمنەكانی و لەوەختی ئیهانەكردنیدا هەست بەكوردبوونی خۆی دەكات؟ دەشكرێ بپرسین كوردایەتی تەنها لەناو قوڕدا دەكرێ؟ كوردپەروەر دەبێ تەنها پاتەی لاستیكی لەپێ بێت؟ كوردویستی تەنها نسیبی خەڵكی بەشمەینەت و دەربەدەرە؟
نازانم من تا ئێستا ئەو مەتەڵەم بۆ حەل نەكراوە، بۆچی ئینسانی كورد هەر بووە خاوەنی دوو دیناری خۆی، هەر پاتە چوپڵێسەكانی داكەند و زبڵی لە خۆی تەكاند، ئیدی گاڵتەی بە كورد دێت و پێیوایە لەكورد دواكەوتوتر لەسەر زەوی نیە؟.
گوتمان برایان ئەوە لەهەژاری رزگارتان بوو، ئەوە سەیارەی شەش دەفتەری و سی دەفتەری و سەد دەفتەریتان موبارەك كرد. ئەوە هەستتان بەگەرمای ئەو هەولێرە پیرە نەكرد، باشە بۆ بەكوردبوونی خۆتان شەرمە؟ بۆ پێتان عەیبە ناوێكی كوردی لەمنداڵەكانتان بنێن؟.
من تا ئێستا نازانم چی دەنووسم، نازانم پرسیارەكەم كردووە یان نا. دەمەوێ بەتایبەتی لەجەنابی پارێزگار بپرسم، لەسەرۆكی حكومەت بپرسم. دەستە و دامێنێ یەكە یەكەی ئەندامانی مەكتەبی سیاسی حیزبە گەورەكان بم، كە سوێندیان خواردووە بۆ خۆپاراستن لەنەخۆشی سیل و تای خوێن بەربوون و تاعوون و دەردەكۆپان، هەتا ئەوان هەن ئەوەندە لەخەڵك نزیك نەبنەوە بەدووربین ببینرێن. لەسكرتێر و بەرپرسانی رێكخراوە چالاكەكانی ئافرەتان و ژنان و خوێندەڤانان بپرسم، دەمەوێ بچمە یانەی كەوبازان و كۆمەڵەی منداڵانی سەرشەقام و لە داروبەرد بپرسم، كێ بەرپرسە لەو دوژمنایەتیە قورسەی زمانی كوردی و ناوی كوردی؟
كێ سیستەمی ئەو شارەی بەدەستە؟ لەكێ بپرسم لەبەرپرسی لقی پارتی؟ لە هەمەكارەی مەڵبەندی یەكێتی؟ ئەو هەموو ناوە سەیرانە لەكوێ دەبیننەوە لە سوپەرماركێت و دوكان و كۆمپانیاكانی نێن. ئەو ناوانەی كە كوردێكی رەسەن دەبێ یەك هەفتەی تەواو خەرێك بێت بیخوێنێتەوە. من هەرگیز باوەڕ بەوەناكەم یەكێك یەك رۆژ لەسەر كوردبوونی ئیهانەكرابێ، لەسەر كوردبوونی تووشی كێشە بووبێت، كەسێك یەك رۆژ كوردی خۆشەویستبێ، شەرمی لە زمانەكەی نەكردبێ، ئەو مەهزەلەی ناونانەی پێ قبوڵبكرێ.
ئەگەر ئەو ناوە سەیر و سەمەرانە بنوسمەوە كە رۆژانە هەر بەرێكەوت بەرچاوم دەكەون، دەبێ یەك ساڵی تەواو هەموو لاپەرەكانی گۆڤاری (سڤیل) بە قۆنتەرات بگرم. تێناگەم كوردێك لەتوركیا، لەسوریا، لەئێران لەسەرئەوەی كە ناوێكی كوردی لەدووكانەكەی ناوە سەد جووت شەق دەخوات، كەچی لەو بەشە ئازادبووە ئامادەیە سەد جووت شەقی تێهەڵدرێ، بەس ناوی كوردی لەئوتێل و سوپەرماركێت و یانەكانی كەیفی شەوێ نەنێ.
هەرچی كۆمپانیای عەرەبی و توركی و ئێرانی هەیە ئەگەر بەزمان و ناو و ملهوڕی خۆیانەوە نەبێت، نایەنە ئێرە و زبڵ و زاڵی خۆیان بەو وڵاتە وەرناكەن. كرێكار و ئایدز و سوكایەتیەكانی خۆیان فرێنەدەنە ناو باخچەی رووحی زمانی كوردییەوە ئاسودەنابن.
ئەگەر تۆپ و تیزابیشمان بەسەرداكەن، نابێ بڵێین لەل، دەنا توڕە دەبن و رزقمان دەبڕن و ئەو سەفتە دۆلارانەی دەیبەن هەروا لەبانكی بەرپرسەكاندا دەمێنێتەوە و رۆژانە دەبێ یەكتری لەسەر بكوژن، حاشا بابێن و چ ناوێكی سەیر لە وڵاتەكانی خۆیاندا جێگای نەبۆتەوە، با بۆ ئەو هەولێرە بێ دەنگ و دڵنەرمەی بێنن.
قوڕەكە لێرەوە خەست دەبێت، سەرمایەداری كورد بەپێچەوانەی سەرمایەداری هەموو دونیاوە، ئامادەنیە یەك تاكە فلس بۆ خزمەتی زمانی نەتەوەكەی سەرفبكات. ئامادەیە ناوی سەگێك، پشیلەیەك، كەرێكی تۆپیوی (نا كوردی) لەكۆمپانیاكەی بنێت، بەڵام ئامادەنییە ناوی دێیەكەی باوكی، گەڕەكەكەی منداڵی خۆی، ناوی ئەو گردەی نەنكی لێی نێژراوە، نەك لەمۆڵەكەی نێت، بەڵكو لەئاودەستەكەشی نانێ، بەدوای ناوێكدا دەگەڕێت، هەرگیز ئەوەی بیرنەخاتەوە، كە پێشتر لەچ زبڵخانەیەكەوە هاتووە.